Ævintýrið Ella Stína

Ella Stína ákvað að halda regluna en sleppa undantekningunni. Hún kallaði því þann sem hún var skotin í prinsinn - í heilan dag. Nú er komið að kvöldi þess dags og Ella Stína hefur uppgötvað að hún lifir í ævintýri. Púffffff!!!! Linda vinkona hennar sagði henni fyrir mörgum árum: Þú þolir ekki hversdagsleikann, þú lifir í töfrum og ævintýri. Það var einsog þetta færi í taugarnar á Lindu en í eyrum Ellu Stínu hljómaði þetta einsog ævintýri, og í fyrra hafði vinur hennar Þorvaldur Davíð sagt við Garp Elísabetarson að hún væri ævintýri. Sagði Þorvaldur það virkilega, sagði Ella Stína með tárin í augunum, og bætti við: Mig dreymdi mig og Þorvald einu sinni, við vorum í útrýmingarbúðum, okkur leið illa, og nú hugsaði Ella Stína hvort þau Þorvaldur hefðu bæði verið í hlekkjum, en þau voru saman í Listaháskóla Íslands og það gat vel verið að skólinn væri að reyna að útrýma svona frægu fólki einsog Þorvaldi Davíð og Ellu Stínu sem voru ofboðslega dugleg við að vera Þorvaldur Davíð og Ella Stína þótt þau væru í hlekkjum. Já, þau gáfust ekki upp, ég heiti Þorvaldur Davíð, sagði Þorvaldur Davíð þótt hlekkirnir væru hann lifandi að drepa, hann var auðvitað ekki hlekkjaður við neinn nema Þorvald Davíð og sama sagði Ella Stína, hún sagðist meira að segja stundum heita Elísabet Jökulsdóttir og orðin heyrðust varla því hlekkirnir drógu hana til jarðar. Og Elísabet Jökulsdóttir var auðvitað hlekkjuð við Elísabetu Jökulsdóttur. Svo hætti Þorvaldur Davíð í skólanum og Ella Stína saknaði hans, hann kom henni nefnilega svo mikið á óvart einsog fræga fólkið gerir alltaf þegar maður fer að kynnast því einsog Ella Stína fékk alltaf að heyra: Þú ert búin að koma mér rosalega á óvart. Besta við Þorvald Davíð var að hann var Þorvaldur Davíð. Og með geisla í kringum sig, og þegar hann kom á horfa á dansinn hennar Ellu Stínu hafði hún ekki séð hann í margar vikur af því hann var hættur í skólanum en þegar hún sá Þorvald breyttist hún og varð einsog Jóhanna Líf barnabarnið sitt sem er sjálfstætt líf í heiminum, jurt sem vex á ókunnri strönd, já. Segir bara hæ og labbar sína leið. En það var á svona stundum þegar hún heyrði það frá mönnum einsog Þorvaldi Davíð að hún væri ævintýri að henni fannst hún vera Jóhann Sigurjónsson skáld endurborinn. Ella Stína var líka soldið snobbuð, fyrst Þorvaldur Davíð segir þetta getur enginn skammað mig fyrir að vera ævintýri, þá er ég ævintýri og ég ætla ekki að vera annað. Þorvaldur Davíð hafði ekki sagt þetta svona einsog Linda, einsog það væri eitthvað tilað hálfskammast sín fyrir, allavega hætta að vera ævintýri. Samt var Ella Stína búin að þekkja Lindu síðan hún var tíu ára og hún reyndar vissi hvað Linda meinti. Linda ætti nú bara að vita að hún er rammgöldrótt. Já nútímafólk heldur að það sé nútímafólk en er svo rammgöldrótt, ævintýri, goðsaga, elding, foss og ég veit ekki hvað. Geisli, tré, álfar. Þetta sést allt í nútímafólki, sést þrátt fyrir jakkafötin, einsog maðurinn sem Ella Stína sem er skotin í, hann vinnur á skrifstofu og er rammgöldróttur. Svo heldur nútímafólk það sé rosa nútímafólk og til sé ein leið inní heiminn, rúlluhurðin í WallMart. En svo byrja börnin í skólanum, skólafélagar Ellu Stínu, og þegar hún varð samferða Vilborgu heim úr skólanum byrjaði hún líka. Það skal tekið fram að Vilborg er rauðhærður eyjafjarðarpúki, þokkadís sem skrifar söngleiki fyrir Broadway og Þjóðleikhúsið og lærði stjórnsýslu áðuren hún sló í gegn í Listaháskólanum. Þær voru að labba yfir Arnarhól þegar Vilborg byrjaði:

Ella Stína, veistu ef ég væri í skotin í manninum sem þú ert skotin í væri það allt öðru vísi hjá mér, það væri næstum ekkert sérstakt en þegar þú talar um hann verður allt sveipað töfraljóma, já þegar þú talar um hann þá er ... þá er... einsog hann sé prins. Er hann prins?

Hann er stjórnarformaður, sagði Ella Stína.

Guð stjórnarformaður veistu þegar þú segir það verður það eitthvað svo... eitthvað svo... töfrað.

Hann er fasteignasali, sagði Ella Stína.

Ertu að meina það, fasteignasali, veistu þegar þú segir þetta þá verður það eitthvað svo... eitthvað svo ... töfrað.

Hann keypti handa mér kastala í Rúmeníu, kastala Drakúla greifa á 60 miljarða, með 260 herbergjum, og 45 pyntingarklefum sem ég get notað fyrir mína sadómasókísku kynóra.

Vá æðislegt, veistu þegar þú segir þetta þá verður eitthvað svo... eitthvað svo ............. töööööööööööööööööffffraðððððððððð!!!!!!!!

*

Ella Stína vissi að Linda meinti að hún væri föst í ævintýrinu. Allt í lagi að vera ævintýri en Ella Stína var föst. Linda sá það. Það var ekki fyrren nokkrum árum seinna að Ella Stína skildi það. Það var daginn sem hún braut regluna, - og sagði prinsinn í heilan dag ánþess að spyrja hann leyfis. Skyldi prinsinn vera búinn að senda mér ímeil, skyldi prinsinn vera í útlöndum, í heita pottinum, í miðbænum, skyldi hann vera fúll útí mig, skyldi prinsinn vera brjálaður útí mig, ætli prinsinn tali aldrei við mig aftur, ætti ég að senda prinsinum sms, ætti ég að fara sund ef ég skyldi hitta prinsinn.

Ella Stína heyrði að það var eitthvað að.

Raunveruleikinn hvarf einsog vímuefni hefði þurrkað hann út.

Auk þess voru engir prinsar á Íslandi.

En hún var með prins á heilanum.

Ella Stína var lokuð inní herbergi, einsog þið munið lesendur góðir var prinsinn aðferð tilað halda henni í lokaða herberginu, en þá spyr ég bara:

HVERNIG ER UMHORFS Í LOKAÐA HERBERGINU???